立法會噚日原定討論由朱凱廸提出嘅「兩級制議會及法定機構的改革」議案，但提修訂嘅民建聯張國鈞對原議案大量刪減並獲主席梁君彥批准，阿廸恐怕喺建制派佔多情況下修正案會獲通過，決定緊急撤回議案，直斥梁君彥「吹黑哨、打茅波」。
阿廸原議案提到2015年區選同2016年立會選舉都反映港人政治投入，建議放寬議員提出法案嘅權力等，但張國鈞嘅修正案卻刪走建議，仲批評泛民炒作政治。阿廸認為修正案同原議案主題不符，曾向梁君彥抗議不果。阿廸同民主派商討後決定撤回議案，質疑梁咁玩後患無窮，會再討論點樣處理如「平反六四」等重要議案。