香港應否輸入醫生，醫生界與經濟學界及智庫一直爭論不休，有經濟學概念之人，老早認定自1997之後，本港醫療界有嚴重保護主義傾向，極力為阻止留學外國之本港學生回港執業，設置路障。假如香港醫生充足，人手過剩，大家就無話好講，但現時情況是盲嘅都睇到，公立醫院醫生護士不足，日做夜做，做到氣咳，疏漏難免，亦堪同情，好似最近聯合醫院及老牌皇牌醫院、港大醫學院陣地瑪麗醫院亦連番出錯，已經響起黃燈警示嘞，特區政府雖然盡量唔敢得罪醫生界，若為民生着想，都要諗下過往「黃金五十」嘅林奮強研究報告及今年「香港團結基金」（喂，係董伯伯搞㗎，林鄭特首要唔要畀吓薄面，仔細審視吓呀？），都大力主張輸入醫生，可見民間已逐漸有共識，獨是醫生界拼命反對。
經濟日報在3月20日報導「香港團結基金」黃元山與醫學會秘書林哲玄，表達不同意見，黃元山同意林奮強之見解，林哲玄有如下講法：「本港一間區域性大醫院半年前有7名醫生入職嘅內科部門，但當中5人因感到工作壓力巨大、辛苦等原因辭職，轉到其他部門或私營市場，即使將人口比例推高至每一千人口有3名醫生，但又有多少人願意留在公營體系、留在內科及急症室等部門？」
對左丁山呢類會考成績曳，冇資格報讀醫科嘅笨人來講，林哲玄之言可以如此理解：7名醫生入職，5名感到工作壓力巨大，辭職而去，咁樣仲唔係人手短缺衍生出嚟嘅問題？假使嗰間醫院內科部有10至14名醫生，可以分擔工作，大家可以早啲放工，於是唔感覺到工作有壓力，願意留在公立醫院呀？現在公營體系正正因為醫生嚴重缺乏，先至引起逃亡潮嘅啫！林哲玄之言剛好證實香港有輸入醫生嘅需要！
昨日吃飯，聽到一位朋友講中文大學嘅腫瘤教授、肺癌權威莫樹錦，雖然世界知名，但因在加拿大讀醫（Alberta），回到中大後不能在港執業，走出威爾斯親王醫院就不可行醫，但呢位大教授啲學生就當然可以啦。朋友嘆一聲：「香港醫學界不能容納海外英才，非香港之福也！」咪係囉，DSE/IB狀元有Johns Hopkins醫學院錄取，都唔敢去呀！另一位朋友之親戚患上肺癌，一間私立醫院肺癌專家初步檢查之後，話做手術要40萬元，不收支票本票，要收現金，嗰位親戚話要考慮幾日，醫生嘅護士竟然連日追call，親戚決定話NO之後，護士擲佢電話，令佢感嘆。「啲香港醫生巴閉到咁，係唔係因為無競爭呀！」