新同盟范國威同區諾軒循補選進入議會，同屬「單頭議員」嘅兩人最終決定加入聯盟「議會陣線」，日後可以同民主派有更緊密聯繫。
議會陣線成員包括香港本土毛孟靜、獨立朱凱廸、街工梁耀忠、人民力量陳志全，加入兩新人後成員增至6人，成為民主派第二大板塊。聯盟唔會綑綁投票，雖然部份成員喺個別立場有分歧，但相信可以通過溝通會有更好操作，毛姨笑稱「左膠右膠可能會變萬能膠……」
趁住新丁加入，慢必送上禮物，佢為區軒預備咗護腰，因為過去議會抗爭經驗，佢發現最容易扭傷腰，佢同時為咖喱范送大聲公同咪，等主席唔會咁容易熄咪。毛姨就送藥貼畀區軒，咖喱范則獲本土特色雞公碗。