跟車太貼易生意外，本來係老生常談，但人類總要重複犯錯。一名單車男日前喺港島石澳道一段雙線雙程嘅馬路行駛時，懷疑跟車太貼，撞上前方嘅保時捷私家車後，飛彈至對面線，橫卧路上，好在佢企起身後8秒先有紅色小巴駛至，否則可能已被小巴輾斃。網民都認同單車男好幸運，真係差一啲就冇咗條命呀。
網民Kidman Océano Jim上周六上載車cam片段至「馬路的事討論區」facebook專頁，直言事發前「我見佢（單車男）已經完全冇收慢嘅諗法，一路爆住去」，結果對方撞上前車，相信「前面架車應該花咗，不過最緊要人冇事」。佢話意外後幸好「對面線冇車……如果對面有司機停唔切（撞到單車男），（單車男）真係害死個司機」，又指「其實呢條路咁危險，真係唔應該踩單車」。
而短片亦可見，一名從後鏡目擊意外嘅司機，不斷向對面線嘅小巴司機揮手，示意對方減速，以免撞到單車男，最終真係好彩冇發生意外咋。
識睇睇留言
Bee Up Seven：𠵱家踩單車嘅人真係以為踩住架單車就大晒，喺行人路度踩，重要狂叮人讓路，唔讓就鬧人，喺馬路度踩，就要車就佢
Poko Yu：簡直喺度累街坊，揸車都明白跟車太貼非常危險喇，你仲係一架單車你可以即時煞停咩？
Roy Royroy：我幾年前已經講單車要踩馬路應該要有車牌，要有第三者保險，如果冇去單車徑踩
資料來源：《蘋果》網頁