雨僑上個月宣佈同拍拖8年嘅羅力威結束愛情長跑，大後日就係佢哋嘅大日子，即將榮升羅太嘅雨僑，噚日繼續開工搵錢，未有為人生大事而不顧工作，佢話：「我係結婚前一日先停工。」
噚日容光煥發現身嘅雨僑，出席喺屯門舉行嘅美容活動，仲擔任美容品牌Dr. Ci:labo全新概念店開幕嘉賓，佢話：「兩個星期前成個人都好攰，連皮膚質素都變差，噚日更加發燒加感冒，好彩休息一晚，已經康復，亦冇傳到畀羅力威。」雨僑自認係工作狂，一直工作先可以有推動力保持最佳狀態，相反休息少不免會變懶，仲會影響狀態，佢自爆婚後工作表，依然爆滿，所以預計8、9月，先可以去到度蜜月。
確保有戒指
籌備婚事過程，雨僑全權交畀未來老公安排，佢話：「我確保有戒指同婚紗就得，日前終於試咗件婚紗，設計師好出色，手工巧奪天工，感覺好澎湃，唔係性感，意思係指婚紗拖尾好長，好靚好感動。」雨僑又話可能要開工，未覺得心情緊張，或者結婚前一、兩日，就會開始緊張。
撰文：馮仁昭