巴塞爾藝術展（Art Basel）又嚟啦。今屆有來自22個國家地區共248間藝廊參展，其中28間首度參與。除咗畫同雕塑，印度藝術家Vivek Vilasini就帶嚟《City-Fifth Investigation》，佢用咗31張米紙放喺新德里一個天台，記錄一個月間空氣污染實況，希望大家反思氣候同污染問題。
台灣藝術家周育正嘅《刷新、犧牲、新衛生、傳染、清新、機器人、空氣、家政、家務幫、香煙、Dyson、現代人》，就將多套人咁大嘅碗筷展現人前，由一個表演者演繹嘅清潔機械人不停清潔，本身作品可以畀觀眾參與，但現場所限變為定時表演。Art Basel明日至31日開放公眾入場，入場費250至400元不等。