林鄭以晚娘腔「幫孩發聲」，扣環團帽子，以便政府扑槌通過填海。
粉嶺高球會那片大過荃灣的靚地，毋需填海，收返就郁，又唔見林鄭發聲。班闊佬不是地主，買了私人會籍，會籍炒高至千幾萬一個，但唔係入政府袋，高球會籍，與無牌龕場一樣，買者落搭，必須自負盈虧。政府無責任賠償，一聲令下，高球會就得滾出粉嶺。司法覆核嗎？哈，潘鄭有無「留意」，會不會「太忙」唔知自己係會員？搵勻政府高官，個個身在其位身有屎，避嫌都有罪。但粉嶺地焦點在於，高球會塊地阿公嘅，平夾賤出租給高球會N年，會方還想博大霧永續侵佔、當塊地係太公分俾佢嘅豬肉？有咁筍嗎？香港闊佬，有銀大晒，物以類聚，為富不仁！林鄭打算跟高球會班大老細行埋，捐三萬元給民主黨，就想大和解誘民主黨叫停收地？高球會強橫可恥，寸步不讓，有錢惡盡，林鄭有篩選地派四千蚊，但四千蚊塞得住市民把口嗎？闊佬打golf，強霸粉嶺，擺明對政府硬銷的大灣區睇唔上眼。姓何那個有銀用PK講到好白，搬監獄上大陸啦笨。啱聽！內地就係一個大監獄！陪睇櫻花好浪漫這句監躉對白，史上最爛！