大灣區已經成為香港政界好去處。特首林鄭月娥亦會喺29日同30日訪問大灣區內3個城市深圳、中山及珠海，其間會主持香港中文大學（深圳）祥波書院開幕典禮，亦會考察中山國家健康科技產業基地、翠亨新區、珠海橫琴新區等，當然唔少得係同內地領導會面。
政制及內地事務局局長聶德權同特首辦主任陳國基都會隨行；3名局長包括創新及科技局楊偉雄、運輸及房屋局陳帆同教育局楊潤雄會參與部份行程，娥特離港期間由政務司司長張建宗署理特首職務。
趙佩玉示威遭冷待
出發去大灣區前，娥特今日到立法會出席問答環節，政府喺庫房水浸下拒絕全民派錢捱轟，受壓下局部派錢亦未獲大眾支持，新民主同盟范國威表明若有提問機會，會要求娥特「還錢」，強調既然派4,000蚊嘅「補鑊拾遺」建議有唔少細節未公佈，就應將派錢加碼至8,000至1萬。區諾軒就話會公開表明支持結束一黨專政，再問娥特：「請問你會唔會DQ我？」
此外，成為網民熱話嘅趙佩玉，噚日同性傾向條例家校關注組召集人黃偉明去特首辦示威，抗議兩位新終審庭法官支持同性戀性解放運動喎。但娥特見到佢哋好快手就收咗信，冇停低同兩人交談。