英國近日爆出咗一單超大型避稅醜聞，涉事人數多達780人，據報當中包括好多球壇知名人士，包括前曼聯領隊費格遜（圖）、前英格蘭國家隊領隊荷杜、艾歷臣同埋多位前英超球星。
英國《鏡報》話，涉事人士利用英國政府對電影業務嘅稅項優惠進行避稅活動，涉及嘅款項總額高達22億英鎊（約244億港元）。報道又指，假如英國稅務海關總署證實有關人士涉案嘅話，將會向佢哋收取投資額嘅20倍稅收，可能會令唔少人破產。
有英國稅務專家就話，當局向避稅人士追收懲罰性稅收嘅做法，肯定對一班退役球星影響最大，因為佢哋掛靴後收入已大不如前，今次俾政府重罰嘅話肯定會一鋪清袋。愛華頓傳奇球星鄧肯費格遜2016年就因為俾英國稅務海關總署追收罰款，最後被迫宣佈破產。
而英國退役球員福利組織「Xpro」就承認今次事件有唔少前球員涉事，並指當中有好多人本身都唔清楚嗰啲所謂投資原來會構成避稅行為，組織就話會盡力協助有關嘅退役球員。《鏡報》分別聯絡過荷杜同艾歷臣，不過佢哋都拒絕回應，而費格遜嘅經理人亦都冇就事件作任何回覆，暫時未知會唔會有球星因為今次事件而破產。