【本報訊】中美貿易戰一觸即發，港股反覆調整，睇好樓市的專家雖然企硬立場，但都發出忠告。中原集團主席兼總裁施永青被問目前入市是否摸頂都回應：「呢個時候投資未必係太好嘅時機！」，「樓市大好友」祥益地產總裁汪敦敬撰文《樓價隨時可跌一成》，希望市民切勿毫無準備盲目入市。
施永青昨認為樓市下半年放緩，「股市氣氛一差，慢慢影響樓市，但現時未係，股市唔會一插到底，而係反反覆覆，之前個個睇好，現時反覆向下調整的機會增加，需要相對審慎啲。」他重申維持今年樓價升幅8%至10%，但首季已升逾3%，相信次季升幅慢過首季。
被問現在入市是否摸頂？施永青回應，「好早已話現時係收割期，唔係播種期。人哋收割去播種，梗係有風險。有新資金流入，需要為資產重新配置，呢啲人咪繼續買囉！但如果得一注錢，呢個時候投資未必係太好嘅時機！」
汪敦敬：要做好心理準備
汪敦敬昨日撰文《樓價隨時可跌一成》，他強調對大市睇法無變，今年樓價升幅比去年多，但升市過程要做好心理準備。「現在太多人太睇好樓市，甚至乎有人認為贏梗，忽略市場發展的鞏固過程。市場調整時，有啲人會恐慌，無做足夠準備入市的人，就算做咗啱的決定都會令到個結果變錯！」
他重申，「買樓唔係一個一帆風順嘅賺錢遊戲，買樓要堅持，鞏固後樓價才會上，想提醒盲目入市嘅人做好心理準備，覺得有責任提醒無準備嘅人。」