近日特首高調批評環保團體反對填海，引起公眾再次熱烈討論究竟香港應否繼續填海建屋，以增加供應，壓抑樓價。
其實，呢個問題要討論根本係多餘。香港由開埠到𠵱家百幾年，好大部份𠵱家我哋用緊嘅地方根本係填海得番嚟。成個港島北嘅商業區、新界嘅新市鎮包括沙田，大埔，將軍澳到東浦、機場等等，隨口講都一大堆，地全部都係填海拎番嚟。如果，香港唔填海，根本無可能發展到今時今日住到700萬人。
如果有人今日先嚟反對填海，其實非常無知。香港土地從來都係短缺，當年港英政府因為人口越來越多，決定喺新界開發新市鎮，不過無地，於是將成條城門河兩岸填平，甚至𠵱家樓價已升到上天嘅馬鞍山，亦係填海得番黎。幾十年後嘅今日香港一樣面對唔夠地起樓嘅困境，繼續填海甚至加大填海規模先至係應該要做嘅野。當然填海地點可以討論，不過妄想唔填海，又可以增加供應，世界並無咁兩全其美嘅事發生。
香港嘅競爭對手新加坡，全國兩成幾嘅地方係填海得到。佢哋嘅政策好簡單，唔夠地就去填，人口增長快，填海拎地嘅速度就要更快，填海填到附近國家連填海用嘅沙石都唔肯賣畀佢。相反，香港仲喺度討論應唔應該填海。人口不斷增長，可建屋嘅土地遠遠追唔上需求。
上咗車買咗樓嘅就大大聲反對，唔好喺我果區填海，填完無咗個海景邊個負責？環保人士又反對，怕填海影響生態。政府又弱勢無辦法營造共識，咁你話樓價點可以唔高？
Melody
Fb.com/whichroad