一位老友在不同餐廳撞過左丁山幾次，前日卒之唔抵得，來短訊問：「點解你每次食飯都係同女性朋友一齊嘅？有乜原因？」好彩佢問得直接啫，唔好在背後亂咁估。答案好簡單，每星期在陸羽或與銀行界朋友午飯，飯腳一定係全部男人老鬼，講政治、講時事、講股票及陳年往事。但去不同酒店、餐廳食飯呢，又多數係與女性一齊，或者係全女性，只有一個左丁山老男人喺度喎。左丁山昔年在銀行工作，男多女少，高級階層無一是女性。轉行入傳媒界後，起初都係見男編輯，男記者為主，但二十年來，女性大量佔領陣地，舉凡記者、編輯、廣告營銷、公關、市場推廣、企業傳訊，以至到廣告客戶（例如銀行），女性揸弗人有增無減，凡係搵左丁山傾生意，或者左丁山搵客戶幫忙嘅，十居其九係與女性接洽，譬如同一間大銀行財富管理部門吃飯兩三次，還未見過對方有男性出現。
所以呢，左丁山在交際場合吃飯，每與女性同枱，故此特別要揀一啲to see or to be seen嘅地方，夠晒透明度，以免被人誤會。從時興嘅女性平權角度嚟睇，香港之女性於25年間迅速變天，絕對不會有甚麼男女同工不同酬，大公司歧視女性等西方無聊問題出現。BBC中國編輯（女性）因薪酬與男同事相差太遠，憤而辭職抗議，揭露BBC男女薪酬有大差別，西方女性高呼不平等。相形之下，香港夠晒先進啦，有一個甚麼團體話香港公司管治落後，董事會缺乏女性云云，其實係攞嚟講，女士由職員升上做總監、董事，有一個過程，過往25年已經有大變，梁高美懿、李慧敏、鄭慧敏呢類女強人銀行家陸續湧現，20年後，香港公司嘅董事會可能缺乏男性！
女強人不住湧現嘅代價（或者有人即刻鬧左丁山古老）係唔結婚。日前碰到一位世姪，做咗大律師，順便同佢去飲杯薄荷茶，問佢做成點，佢話行內猛人如雲，要捱一輪先至有作為，新進叻人就有不少係女大狀，個個係讀書精英，口才靈敏，令男士望而生懼之輩，不過可惜吖，世姪嘆一口氣：「多數冇拖拍，單身！」講完，左丁山怕世姪會犯上森馬斯錯誤，叫佢以後少提呢類事，否則會被視為政治不正確，好似森馬斯被迫辭去哈佛大學校長職位咁。好似前幾日到Sabatini吃午飯，點完頭盤及主菜，小G話幾啱心水，轉頭對侍應講：「Me too!」，左丁山幾乎噴咗熱茶出嚟呀！