【文化籽：果籽人話】
今時今日，香港樓價癲得嚇人，若沒「父幹」，任你死慳死抵，不吃不喝N年也未必可成功上車，看似荒謬，但仍有不少年輕人以此為終極目標。有80後情侶不甘做羊群，不買樓，三年前裸辭出走環遊世界一年後，回港一擲十多萬買下一艘舊遊艇，以此為家，就算要日打三份兼職養船，為船而活，也覺無憾。
今年32歲的羅家健（Rex）和葉翠霞（Sarah），原本是在中環商廈返工的白領，在長洲長大、性格坐不定的Rex，工作10年後決定出走到澳洲和愛爾蘭工作假期；鍾意旅行、留港繼續打工的Sarah，不想再面對辦公室政治，3年前也毅然辭去高薪厚職，陪Rex環遊世界，二人花一年時間環遊了38個國家，回港後，就算有不少獵頭公司叫他們返工，都一一拒絕，最後選擇在長洲買一艘43呎長的三手遊艇居住，兼全職打理，算是圓了Rex自小的海上生活夢。「樓價太癲，點解要用癲價去做自己唔鍾意嘅事？我哋𠵱家用合理價錢，做到自己想做嘅事，一樣達到目的，都係有個地方住。」Rex說，家住大埔公屋的Sarah也說：「住船幾好呀。樓又一定買唔到，四、五百呎買返來就供一世，見到朋友咁樣我好驚，我情願買船住。」
住遊艇，聽上去很嘆很離地，一般人眼中的船上生活應是每日起身就去釣魚，夏天就曬太陽，閒時就拿着兩杯紅酒在談情看海，但他們卻說：「從未試過，雀屎就有一大堆，住喺船上唔係大家想像中簡單。」他們買的是木船，船齡逾30年，算舊，執漏自然多，「呢邊爆咗要補油，嗰邊又要補纖維膠水，否則會入水，要做的話，365日都可以有嘢做，真係唔簡單。如果諗住一邊返全職一邊做，我勸你唔好試。」
二人沒再做全職，靠在長洲做幾份兼職去養船，Rex間中幫舊公司兼職，又在朋友的餐廳廚房做炒散，Sarah在島上的民宿做顧問銷售房間，又兼做補習和侍應，周末帶遊客出海觀光、吃五層海鮮塔賺使費，六成收入都花在船上。為了慳錢，船上一切維修和佈置，他們都親力親為，大部份家具從二手網購得，他們慶幸遇到不少熱心的長洲人，送贈了兩艘小艇、船繩等必需品。他們直言，最初對這個家有點憧憬，但環遊世界那年，他們住慣了簡陋民宿、火車或當沙發客，再差的環境也住過，最後決定簡單佈置就算，他們的家沒有豪華的裝潢和多餘的佈置，睡房也只得一張梳化床，但已足夠令他們滿足，Sarah說：「如果我係一般港女，係完全接受唔到，阿Q哋諗，呢度有雙人梳化床，個廳成千呎，又有天台，有360度海景，幾好呀，你有冇吖？樂觀啲係開心啲。」
他們去考船牌，閒時去船廠和機器廠找工人傾偈偷師，還有Rex家人幫忙，「我爸爸係職業漁民，經常來幫手，如果冇佢呢隻船應該沉咗，經歷一個颱風就玩完，打風佢堅持上船，比我哋更緊張。雖然好多嘢我哋要重新學，但過程開心，從冇後悔過，既然買得返來，所有事要自行承擔。」雖然大部份收入都花在船上，但仍覺值得，「心態就好似養細路咁，無私奉獻，希望嚟緊有盈餘，唔使再返咁多兼職。」
