到底立法會前主席曾鈺成仲係咪建制派？如果有睇開佢報章專欄文章，可能會誤會佢變節過檔咗民主派，皆因佢批評特區政府嘅力度比起民主派，有過之而無不及。繼早前連出幾篇文斥娥班子拒全民派錢後，曾鈺成又出招，針對特首林鄭月娥上周喺民主黨黨慶晚宴捐款3萬元兼喺Instagram標籤「大和解」，借茶客對話指娥特「High過頭就揩嘢」。
曾鈺成喺專欄續以一貫作風，虛擬茶客對話論政。先由茶客甲講及林鄭捐錢畀民主黨令建制派嬲嬲豬，茶客丙就話林鄭喺北京趕返港後率高官撐白鴿黨場，已經畀足面啦，茶客丁就直接批評娥特：「這叫做弄巧反拙，High過頭就揩嘢。」
指IG標籤畫蛇添足
其間都有茶客持相反意見，覺得贊助表演搞氣氛好平常，而且捐嘅又唔係公帑，有咩唔啱？直指「有些人就是要小題大做，雞蛋裏挑骨頭」。此時又有茶客出口，一話捐錢冇問題，敗筆卻係畫蛇添足喺IG寫「大和解」，令白鴿黨急住洗脫「被和解」嫌疑，另一人就話捐錢兼寫「大和解」呢3粒字，抵銷咗官員出席晚宴嘅正面作用，而白鴿黨或為避嫌而喺議會加重火力，娥特親善之舉不單未能改善政府同反對派關係，仲激嬲建制派，相信林鄭「始料不及」喎。