香港人有壓力，馬路上碰撞嘈交甚至動武都屢見不鮮，但由勸交變嘈交兼吹埋雞，咁搶戲嘅配角又真係好少見。
兩位主角瞬間變配角
網民Kenneth Lee喺「巴打絲打Facebook Club」fb專頁上載短片，片段事發地點為荃灣鹹田街，房車司機同電單車司機嘈交仲郁手郁腳，房車乘客就做和事老將兩人分開，其間有七人車疑似因被阻去路狂響按，原本負責勸交嘅乘客馬上轉而指住響按七人車司機「你行x開啦，x你老母」，響按司機唔忿氣，落車大叫「乜x嘢」，鬧鬧吓響按司機仲向天大叫「嘈交呀」，疑似吹雞叫人支援。原先嘈交嗰兩位主角瞬間變配角，個樣無奈到呢……
其後一輪唇槍舌劍後，響按司機又向天大叫「喂阿寶！落嚟幫拖啊」，房車乘客似乎淆底但死撐：「睇你點x樣。」響按司機就叫佢將架車泊埋一邊唔好走，似乎想援兵一到就發難，但房車乘客同司機隨即雙雙上車並絕塵而去。有網民聲稱當時喺現場，雖然房車迅速走咗，但響按真係轉彎停低，之後仲有兩名踢鞋嘅男子疑似被召喚落嚟幫拖！
識睇睇留言
Pong Siu：
人哋向天叫，揸高達嗰個阿寶，係人聽到都9秒9走人啦！
Wing Shiu：
係夠料嘅拳頭行先啦，咁多對白，仲要叫人，要多人過對方先夠膽嘈咁解囉！
John Lam：
即係最終都冇郁手，得把聲，喺大陸已經打出勝負散埋水啦，冇Q用。
Steven Hui：
揸車等於攞武器出街，躁底真係唔適合揸車！
Lo Mei Lei：
阿寶揸住高達喺日本飛緊過嚟冇咁快到……
Lo Ban Law：
真香港人，只用口不會動手！如果新香港人一早開波啦！
資料來源：《蘋果》網頁