自從阿歷斯山齊士高薪加盟曼聯之後，有傳保羅普巴就一直都好唔滿意，成日嗌要加人工，要同山齊士睇齊咁話，除咗場上表現失準之外，亦同領隊摩連奴有唔少拗撬。英國傳媒就話，摩連奴終於頂普巴唔順，唔係決定加佢人工，而係賣咗佢呀。摩佬就希望可以收返兩億鎊（約22億港元），然後再大換血，目標直指五虎將，包括皇家馬德里中場卻奧斯同埋摩佬帶領皇馬時大力提拔嘅中堅華拉尼。
摩連奴希望將普巴套現兩億鎊，然後收購五員大將，包括皇馬雙星華拉尼同卻奧斯，預計要使超過1.7億鎊；如果買唔到，摩佬就會將目標轉移向巴黎聖日耳門（PSG）孖寶，巴西中堅馬昆奴斯哥利亞同「新派路」馬高華拉堤。另外，摩佬亦有意以4,500萬鎊買入祖記翼衞阿歷士辛度去取代勞基梳爾。
有傳施丹對普巴加盟深感興趣，不過皇馬就傾向想要迪基亞多啲；而PSG就認為法國人普巴加盟法甲球隊屬「天作之合」，以馬昆奴斯同華拉堤換普巴，係個對於兩間球會都「雙贏」嘅局面。
山神否認被杯葛
至於早前有傳被杯葛，要自己一個食飯嘅山齊士，佢就話係因為佢太勤力，每次練完波都會加操30分鐘，當佢沖完涼，大部份隊友都已經食完走咗，所以先好似「被孤立」咁。即係咩？即係我杯你，唔係你杯我呀！
