優雅低俗燈塔式競馬雜誌《水圍與巴黎》第二集上線了！
今次，家住大西北嘅天水圍首席馬評家（好似係）阿秋，留意到而家好多馬名都用數目字組成，例如「五十五十」、「六十六十」、「七十七十」、「八十八十」等。
阿秋仲同另一主持、有靚靚人妻之稱嘅Paris，嚟一次亂噏純數字不負責任嘅馬名call馬大賽，俾各位馬迷評價，究竟邊個講得好啲！
事實上，話自己粗人一等嘅阿秋，喺起馬名方面亦有自己一套心得，例如抵死啲嘅「大檸樂」，以及低俗味濃嘅「入晒你」，至於行高貴路線嘅Paris就鍾意「平胸仙子」、「肌肉型男」，呢啲充滿幻想空間嘅馬名，唔知馬迷like邊款多啲呢？
其實，馬會有個部門專門審批馬名，但凡有賣廣告或者商業成份嘅馬名，一律都唔可以用，而馬王級嘅馬名亦唔可以重用，睇怕阿秋啲馬名要諗過啦！