港台節目《視點31》月初喺facebook專頁使用「習帝永續？」字眼，引起建制媒體「HKG報」攻擊，港台喺HKG報投訴同日迅速跪低，下令刪去有關字眼。將於8月初約滿嘅港播處長梁家榮噚日召開內部會議同近50名員工交流，據知席間討論過上述事件，有與會者話梁冇話要追究個別同事，強調港台係按正常機制處理，唔係因為HKG報投訴而跪低。
早前有傳商經局常秘利敏貞曾大發雷霆，明言如梁家榮未能就此善後，續約「凍過水」，據知梁家榮席間亦提及同利敏貞會面前，已睇過相關帖文，當時已決定要求港台各部組暫停所有fb帖文。
叫同事「小心啲起題」
據知梁家榮亦接納員工意見，認為由相關節目監製批准fb帖文已經足夠，但重申自己係「老一派人，要穩陣啲」，指員工日後「要小心啲起題」。至於係咪有意續約？據知梁家榮只稱「會好好做埋呢幾個月」，冀為港台建立良好根基。
港台發言人就話呢次會議唔係因應早前面書事件而召開，梁家榮係就港台節目同員工進行一般恒常交流。