四千元補鑊拾遺，茅波大灑納稅人金錢，但申領方案複雜到阿媽都唔認得。坊間有好多懶人包，睇吓幫唔幫到手，市民有心理準備，自己執生，千祈咪亂咁申報，誤墮法網。
燒過基本法道具，唔理係A3抑或A4紙甚至地府冥紙，這四千蚊，申報咗，五五波，會被DQ。用什麼理由褫奪呢？有！被葉劉舉報，「可恥！」
偷走特大垃圾桶坐地鐵的69歲清潔工袁伯，照計符合條件，但推咁大個桶入港鐵，擺明剃馬主席眼眉，隨時被港鐵票控喎，會不會係萬寧婆婆印花案翻版？個垃圾桶值三萬蚊嗎？抑或港鐵罰袁伯四千蚊？
幫親共派助選的粗口大媽大叔，收四千蚊？咁奀？即係比民主黨收得更少。喺大陸有N間物業的大媽x晒茅波老母，大叫「我要三萬銀」！四千？妖，擲返俾茅波做帛金啦！
政府慣性使茅招，申報時個別人士被要求簽「確認書」，要宣誓永續效忠習帝，擁護習帝一黨專政。真心與否，由申報主任定奪。唔，林鄭無樓揸手，第一個率先申報，hastag「大和諧」，五毛like到上鼻哥。