當今立法會最資深嘅議員係民主黨涂謹申，阿涂1991年以28歲之齡成為當時歷來最年輕議員，直至今日足足做咗27年議員，但如果要講到議會嘅淵源，阿涂就未必夠勞工及福利局政治助理馮興禮（Henry）咁深。吓，去年30歲就加入政府嘅Henry，邊有可能有咁深厚議會淵源？但如果大家知道佢爹哋係立法會前秘書長馮載祥就唔驚奇嘞。
夢想做網球王子
Henry話大約8、9歲嗰年，立法局搞記者同樂日，有個環節就係議員同記者嘅網球比賽，爸爸就帶咗佢同議員打番場友誼波，對手包括黃宜弘、吳亮星、霍震霆等前議員。
唔好睇少Henry，佢自細已經由舅父教打波，所以球技有番咁上下，佢仲話最記得霍震霆絕無欺場，對住佢呢個小朋友都盡全力咁打。至於賽果係乜？咁耐嘅事佢都唔記得。同好多小朋友一樣，Henry細個都有過做網球員嘅夢想，直至到英國讀書，見識呢個世界天外有天，先決定都係專心讀書。
喺英國碧仙桃大學經濟及財務學學士畢業後，Henry先後喺廣告界同旅發局打工，去年先入熱廚房。今年中會同女友拉埋天窗做老襯。正因為細細個已經出入議會，家陣做政治助理，經常都要去立法會，佢話有時遇番一啲當年細細個已經認識嘅立會秘書處職員，真係令佢既感動又感慨喎。