新界元朗以出產肥美黃油烏頭聞名，走入呢區街市魚檔，店前都會鋪滿大大小小嘅烏頭魚，任君選購。雖則元朗有自家魚場，但食得嘴刁嘅「食家」都知道，識食一定食游水活魚，最近網民有「好介紹」，上載嘅短片可見有地盤工人以挖土機，喺黃大仙嘅啟德明渠鏟出大量活蹦亂跳嘅鮮魚，同飲食節目中漁民網魚嘅畫面極相似。
近期少食鯽魚烏頭為妙
facebook專頁「無厘頭速遞」近日上載一段1分鐘短片，話片段由地盤工友傳來，片中有多名工友正將黃大仙彩虹道同大成街交界啟德明渠中嘅活魚，先用魚網撈起，置於挖土機嘅挖斗中，再將魚搬上地面，然後運走。片中未有交代活魚去向，但無論係撈魚工友或駕駛挖土機嘅師傅，撈魚時都好小心翼翼。上載者特意提點，片中所見魚類多為水渠中常見嘅鯽魚同烏頭等，仲話近期不宜去附近餐廳點選呢類餸菜。
《蘋果》翻查啟德明渠相關的文件，發現早喺2005年嘅《施政報告》已提及「覆蓋啟德明渠」工作，當時仍任職發展局長嘅林鄭月娥都曾到該處視察。由於啟德明渠屢傳惡臭，又曾於大雨時水浸，當局多年來都喺該處進行改善工程。據政府最新文件顯示，撈起大量鮮魚嘅嗰段明渠，附近嘅改善工程預計今年內完成。雖然明渠有活水流動，但水中多沉積不明微生物、廢棄物及大量細菌，所以即使渠中魚靚，都不宜食用。
識睇睇留言
Ngai Miguel：蛇齋餅糭加餸
李英華：放生魚塘咪最後又俾人釣上嚟食，俾人感覺良好箒
Paul Wong：呢班人會咁慷慨攞去放生？好多附近泰菜最近優惠食烏頭
Loveaby Lam：嗰啲唔係烏頭，係烏糟
David Wong：曾經都發生過，係海水倒灌
資料來源：《蘋果》網頁