特首林鄭月娥早前出席民主黨黨慶晚宴，伸出和解之手捐款3萬蚊令人議論紛紛，政務司長張建宗噚日更山長水遠入到屯門，參加民主黨立法會議員尹兆堅嘅辦事處開幕，唔通娥特有令，娥班子和解行動陸續有嚟？尹兆堅強調，小肥張司長出席開幕禮同特首提出嘅大和解無關，仲話當晚娥特喺facebook出咗「大和解」hashtag後，自己感覺係「被和解」，強調對政府態度冇變。
噚日現場所見，小肥張同阿尹有講有笑，白鴿黨主席胡志偉都有親臨撐場。阿尹指議員作為公職人員，難免同官員有工作上嘅接觸，強調白鴿黨會續以「是其是，非其非」原則，監督政府工作，好似近期嘅土地房屋政策同立法會早前審議修改議事規則時，民主黨都有批評政府，唔擔心被市民誤解。