利物浦同拜仁今季會唔會喺歐聯碰頭就未知，不過兩軍嘅元老隊上周六就喺晏菲路球場上演咗場表演賽，幫紅軍慈善基金籌款。資深嘅球迷今場波肯定睇得開心，事關兩邊嘅陣容都係星光熠熠，科拿、謝拉特、麥馬拿文、古積特同兩隊都效力過嘅沙比阿朗素上半場為紅軍上陣；拜仁元老隊就有馬圖斯、馬卡爾、東尼、李沙拉素等。
發福科拿肚腩識入波
雖然話係元老賽，不過懷斯、丹尼爾艾格、加歷查呢班球員都係退役冇幾耐，仲係跑得踢得，雙方亦都合演咗場入球騷。利物浦喺比賽早段佔優，壓過拜仁半場進攻，五分鐘就由古積特接應奧雲嘅過頭波，頭槌頂成1:0；四分鐘後，輪到謝拉特喺右路傳中，奧雲把握到替拜仁門將佐治畢特甩手，門前執雞射入成2:0。17分鐘，科拿門前接應古積特傳中，無人看管下用肚腩將球撞入至3:0。
不過拜仁隨即上演大反擊，先由東尼20分鐘接應薛羅拔圖傳中頭槌建功追至1:3；22分鐘，保羅沙治奧右路傳中，薛格拿遠柱窄位再頂入成2:3。之後保羅沙治奧亦喺禁區頂妙射建功，加上沙比阿朗素「派膠」，喺自己禁區內轉方向傳失，變相助攻薛格拿頂入梅開二度，拜仁13分鐘內連入四球反超前，利記要到完半場前，先由科拿射罰球省中迪米捷利斯改變方向，扳平4:4返更衣室。
謝拉特懷念並肩作戰
沙比阿朗素下半場就改着拜仁波衫，兼且喺73分鐘射入咗個靚罰球。不過既然係表演賽，就梗係要和和氣氣啦，利物浦完場前兩分鐘就由後備上陣嘅凡美勁射破網，幫紅軍追成5:5平手完場。
謝拉特拍沙比阿朗素，可以話代表住紅軍球迷一代集體回憶，神奇隊長賽後就話，好高興可以同呢個當年嘅最佳拍檔再次同場踢波：「我一直都好懷念以前同沙比一齊比賽嘅日子，佢係一個好球員同好人，同佢一齊踢波，永遠都唔會厭。」而沙比都話可以返到晏菲路踢波感覺好特別，仲好搞笑咁解釋上半場嘅失誤：「當時我搞錯咗，唔記得自己仲未換拜仁波衫，所以咪傳咗畀薛格拿囉！」