fb驚爆大醜聞，股價大跌，在3月19日連累美股三大指數跌得不亦樂乎，日本香港亦受株連，投資人士多得fb唔少。fb於2012年5月17日上市，招股價為38美元，上市後衝上45美元高位，誰知之後fb股價反覆向下，於2012年的低價為17.55美元，當時股東無不怨聲載道。
記得fb上市前，左丁山一位老朋友曾介紹一位矽谷科技股基金經理來港推銷基金，向幾間本地華資基金/證券公司推介，該基金有乜嘢賣點？就係投資組合內有未上市嘅fb及Twitter股票，嗰位美國基金經理人話：「fb及Twitter上市後，我隻基金就會升值，升得好勁㗎。」但本地芬佬仲未有充份認識fb，聽完全無表示，令基金K空手而回，不無失望之意。
上市跌破底價後，一位芬佬在中環街頭碰到左丁山，笑笑口講：「喂，你位朋友睇錯市，fb冇料到。」哎吔，一時之間，無言以對，早知自己入市撈底啦，不過有早知就冇乞兒，fb股價在2013年扶搖直上，一路升到今年一月尾最高價195.32美元，係低位嘅11.3倍，近日雖然大跌，仍然在160美元以上，假設上市日以45美元買入，持有至今，仍然賺咗3.6倍。
左丁山係老餅，自己冇fb戶口，亦拒絕好多朋友add自己做個friend，根本唔明白fb嘅日常操作，但又不時在fb出現噃，原來不時同朋友參加飯局，好多時同人影張相，佢地一瞬間就擺上fb，於是失驚無神收到唔會經常見到嘅朋友來WhatsApp：「哈，喺我個friend嘅fb見到你食緊私房菜！」fb全球有22億用戶，即使左丁山唔肯加入，個人行蹤還是無所遁形，如果有專門監控fb嘅機構利用fb平台收集個人資料，話都冇咁易。
果然，好似睇間諜電影橋段咁，英國嘅劍橋分析（Cambridge Analytica）就專門利用fb平台，收集幾千萬人嘅私隱、資料，再由AI分析，將分析結果出售圖利，賣俾任何一位做正經事（市場調查、推銷產品）或搞陰謀之政黨政客，總之見錢就開眼，特朗普競選團隊就係其中一個客。有咗fb資料，可再進一步派烏克蘭靚女（大概夠多夠cheap）上門色誘，留下數碼足迹，以備後用（勒索、恐嚇）。呢個世界，有咗fb之後，大變特變，原來每一個人都好怕寂寞，需要fb圖片訊息嚟證明自己存在，個人私隱斗零都唔值，完全免費提供畀劍橋分析與中宣部等等機構存檔，分析，以備後用，fb有22億個帳戶，猶如天羅地網，地球人難逃各式各樣監控！