噚日喺兆基創意書院舉辦嘅民間扶貧高峯會，由社福抗貧聯盟主辦，好多人參加。
全場最搶眼莫過於一架流動露宿車，木板製造，仲有4個轆，由72歲嘅露宿者根叔親手設計。原來佢以前試過俾政府人員清場，沒收咗全副身家，所以先諗到整一架有轆嘅露宿車，方便走鬼保障自己。堅持自食其力、唔拎生果金嘅根叔仲話「瞓街都一樣有貴重嘢」，批評政府清場「唔當我哋（露宿者）係人」，最希望政府主動安置露宿者。
同場仲有模擬劏房、VR劏房同劏房相展，畀市民感受吓劏房到底有幾窄。中庭更加有一塊巨型畫布，畀參加者發揮創意，畫出關於貧窮嘅心聲。有人寫咗想用高爾夫球場起公屋，又有人畫咗個地球，「希望世界可以公平」。唔知市民嘅心聲，林鄭又聽到未？