噚日鄉議局大樓內開咗幾個牌局，籌碼你來我往，唔通係開賭局？非也。原來係上水鄉事委員會主席侯志強話要推廣傳統文化，搞咗個新界天九王大賽，仲請埋立法會前議員黃毓民、鍾樹根到場，造就喺議會水火不容嘅佢哋嚟個罕有selfie。
Tree根務農種番薯大米
黃毓民一落場就即刻露兩手，話自己細細個就識玩，但係識天九嘅人越來越少，最近一次已經幾年前同人民力量陳志全玩。而本身唔識玩天九嘅Tree根，竟然被委任為「國際天九協會榮譽會長」。Tree根自嘲自己「逢賭必輸，連打牌都唔識」，但大會送咗份天九入門嘅筆記畀佢，佢承諾搭飛機時會去鑽研吓。
Tree根卸任議員後一直忙做農業顧問。對於內地政府日唱夜唱嘅大灣區，Tree根話自己農務客戶由海南到東北都有，大灣區對佢來說規模太細啦。佢透露𠵱家除咗喺海南種番薯，最近又喺東北大米項目度研究改善土壤同種植方法，預計今年中開始收割。
發起今次天九比賽嘅侯強就話，自己6、7歲已經識玩天九，日久便成精，仲豪言：「唔識寫個輸字！」但佢話對方即使輸錢，新界人始終有修養，「總會留番條底褲畀人」。
至於元朗十八鄉事委員會主席梁福元之前講過考慮退休，侯強話真嘅話會係鄉事損失，咁佢就少個敵人，唔使再請佢食飯啦。佢仲話自己都考慮退休，但主要都要睇鄉親「畀唔畀我做」。
李八方
