今季紅軍球迷頭號寵兒，一定要數穆罕默德沙拿喇！呢位埃及前鋒今季英超已經射入28球，近排就傳出皇家馬德里對沙拿好有興趣。不過，有傳利物浦方面已經做好準備，決定將周薪加到20萬鎊（約223萬港元）畀沙拿，誓要留住佢！
早前利物浦名宿麥達莫就表示，沙拿係杜格利殊之後利物浦最好嘅收購：「除咗杜格利殊，我從來冇見過有人第一季嚟到晏菲路就勁到咁！」用到國王嚟比，無他嘅，沙拿今季各項賽事已經射入36球，有機會破埋魯殊一季入47球嘅紀錄。英國傳媒報道，夏季極有可能大換血嘅皇馬，已經將「英超美斯」當成其中一個收購目標。不過沙拿唔似舊隊友菲臘比古天奴咁渴求轉戰西甲，仲指自己好鍾意英超。雖則係咁，但紅軍會方已經諗住加周薪至20萬鎊留住呢位好波之人。
另外，傳出季尾完約就離隊嘅安利簡恩，表示周薪要加到20萬鎊，先考慮動筆。即係咁，你又要20萬鎊，沙拿都係20萬，你覺得邊個值啲呢？