香港雖然剛剛踏入春季，但天文台前日下晝係坪洲錄得最高23℃，咁喺附近嘅迪士尼樂園，溫度相信係咁上下，一班扮演迪士尼卡通人物嘅演員喺咁嘅天氣下，着住勁厚又唔通風服飾，咪話唔辛苦！有網民拍到有演員巡遊時懷疑身體不適，幾乎倒地，要由旁人攙扶立即離開。
StellaLou撲上攙扶
據fb專頁Ms.com轉載嘅片段，迪士尼樂園前日巡遊時，扮演卡通人物ShellieMay嘅演員，行行吓突然不適，彎腰後幾乎倒地，StellaLou及其他工作人員見狀，立即上前攙扶，將佢帶離巡遊隊伍。
香港迪士尼樂園發言人回應話，事發喺前日下午4時許，該演藝人員參與「明星嘉年華列車」節目期間有些不適，隨即送往急救站，經檢查和休息後已無大礙，隨後已回家休息。雖然迪士尼話呢位演員已無大礙，但網民就唔係咁睇，網民Stephen Lee話，前兩年去迪士尼熱到由頭濕到落腳，見啲員工着住呢啲戲服喺度跳舞，真係戥佢哋淒涼！另一網民Suey Lam話，做演員就算有時熱到不停流汗，都係the show must go on，認為迪士尼應好好檢討！
李八方
