香港教育大學噚日頒授榮譽院士畀5位社會人士，表揚佢哋對教育，教大及社會作出嘅貢獻，5人中除咗有一直關注少數族裔教育問題嘅現任立法會地產界議員石禮謙，仲有教育界立法會前議員、民主黨張文光。
張文光話對於獲頒此榮譽非常榮幸，指自己多年來從事教育工作，其中一項極力推動嘅，就係香港應該有一所教育大學，最終教院能夠升格做大學，而自己喺教大獲授榮譽院士，別具意義。
得獎者通常都會有個水蛇春多謝名單，張文光則趁機發表愛的宣言，指40年以嚟嘅教育同政治生涯，面對過艱苦波折，最終可以走到咁遠，最重要係有太太相陪，話未來過多啲二人世界，會係人生最大幸福，張太聽到一定甜到漏咯。而教大校董會主席馬時亨上午出席教大榮譽院士儀式後，下午陪特首坐高鐵，夜晚仲要主持院士晚宴，連走三場，忙到七彩。