立法會補選新丁本星期履新，噚日首次參與內務委員會同財務委員會，八方聽聞佢哋其中3個已經申請緊加入事務委員會，港島區區諾軒連埋財委會同轄下嘅小組、委員會，數目仲係4人之冠。
阿舜話要夾吓時間
八方聽聞，區軒、新界東范國威同建測規園界謝偉銓已經申請加入委員，區軒一共入咗7個事務委員會，包括交通、政制、教育、民政、保安、食衞同房屋，區軒話，初時都會擔心自己係雙料議員難以兼顧，但請教民主黨許智峯後，發現「佢都係入7個，都OK喎」，所以就決定去馬，而最重要係入食物及衞生事務委員會，事關同反領展息息相關。
至於咖喱范除咗加入咗發展、交通、環保、教育事務委員會，亦都會加入工務小組，而謝偉銓就已經加入咗共6個立法會事務委員會。至於九龍西嘅鄭泳舜就話自己身兼區議員，不時要返去開會，所以要再夾一夾時間先決定，但話自己想主打房屋發展同教育，所以無論如何都會加入呢3個委員會喎。