最新見習騎師黃俊周日（25日）正式落場比賽，受讓十磅共策三駒，分別為師傅苗禮德馬房「欖球鑽石」及「快樂神駒」，以及本地倉主沈集成旗下「金湶德」。
今晨（22日）黃俊都替3匹出賽馬操練，為首戰做足準備工夫，當中外借策騎的沈廐「金湶德」，這一朝為此子首次過檔，除了大圈跳兩段，連機坪踱步亦親自主試，增強人馬溝通。
踱步期間只見練者沈集成亦從旁向這一位新人指導，而黃俊則細心聆聽，後生仔肯虛心學習，態度正確。
「金湶德」此今6戰雖然未有建樹，但陣上顯示過本身速度亦不弱，而且自去年11月底首次出賽起，幾個月下來已減去8分，在四班出戰已經只需孭輕磅，如今更配上十磅仔策騎，今次實際負磅只係107磅，輕飄飄又可擺前走，隨時有突破性演出未定。