習帝啱啱永續，內地正歡天喜地，點知國足就真係傷害人民感情，竟然喺呢個時候遭到恥辱大敗，大掃熱愛足球嘅習帝興。周三中國盃展開，作為東道主嘅國足，慘負由傑斯首次領軍嘅威爾斯0:6，仲要喺上半場已經落後四球，而今次有份隨威爾斯東征嘅加里夫巴利，仲入三粒戴埋帽，以29球過埋魯殊嘅國家隊入球紀錄，果然收足錢冇揸流攤。
點解話收足錢呢？咪因為話國足今次邀請威爾斯、烏拉圭同捷克參加中國盃，報酬相當豐厚，據了解，威爾斯今次就有成100萬鎊（約1,100萬港元）落袋，但條件係必須帶埋巴利，否則就會扣10萬鎊，以確保強陣出擊，等一班內地球迷可以見到更多有睇頭嘅球星。
巴利威水破魯殊紀錄
雖然話教練納比想試陣，國足冇派最強陣，但都冇理由輸得咁慘烈，真係一個巴利，就搞到國足防線潰不成軍。上半場兩分鐘同21分鐘已經個人省兩粒響頭炮，而且完半場前禾基斯同哈利威爾遜又各入一球，以4:0返回更衣室。至於一班中國球員，好似新星韋世豪同喺中超踢到曉飛嘅武磊等，呢場波完全零表現。威爾斯半場過後繼續狂攻，禾基斯喺58分鐘將比數改寫為5:0，然後巴利四分鐘後再次單刀射破顏駿凌嘅十指關，上演埋帽子戲法，自己亦過埋前輩魯殊，以29個國家隊入球成為威爾斯史上最多入球球員，真係要多謝晒中國。
好彩巴利之後亦功成身退，令國足輸唔過半打，但真係令求大俠諗起早前因為喺大陸兩會採訪時不滿隔籬記者問問題太長而反白眼、傳被DQ嗰位內地女記者，唔知呢班國足加埋教練納比，賽後會有乜嘢下場呢？而內地傳媒亦用「慘案」形容呢場大敗。
