香港有個都市傳說，傳聞各條快速公路嘅慢線同中線，係有鬼嘅，以致俗稱「快線」嗰條最右行車線，成為各路駕駛英雄必爭之地，無論車速快慢，都硬係鍾意長期佔用快線。日前網上出現咗一段「快線爭奪戰實錄」短片，由路過片主前後車cam拍低整個精采過程，網民都拍爛手。
片段顯示拍攝日期係19日下午約3點，當日天氣麻麻有微雨，地點相信係青葵公路機場方向，準備進入長青隧道前嘅橋面路段。行緊中線嘅片主車身原裝尾翼略略遮擋視線，但不難發現斜後方嘅快線有部黑色私家車，同中線片主車速相若行駛。
撼石壆輕微損毀
忽然黑車後方有架紅的快速抽頭切入中線加速，黑車即刻篤油封位，防止的士爬頭，但的哥似乎豁出去，全力加速下成功喺片主同黑車之間空隙重新切入快線，但疑因車速太快、動作太大、條公路太濕滑同埋司機太粗心大意，終於跣胎了。
的士一度嘗試反手軚修正，可惜變咗拓海絕技「慣性飄移」，車尾由右擺去左，司機再反軚但無法力挽狂瀾，車身順住衝力轉足360度，最後因第三次回軚唔夠快，的士左邊車頭細細力「錫」咗路邊石壆一啖，未有嚴重損毀，相信司機都冇乜受傷，起碼片尾見到司機哥哥雙手有動作，作為花生友嘅片主亦忍唔住讚嘆咗句「OK喎」。
識睇睇留言
Billy Wong：用愛膚堅啦！
Ho Olo：尾嗰吓扭番右就係一個慣性飄移？？
Weihuen Wong：好明顯係香港腳發作……
Man Ho Li Kkc：神剪片，笑到我！
Billy Yeung：的士佬以為自己揸緊跑車，夜晚仲勁架架車神上身仲刺激過坐過山車。
資料來源：《蘋果》網站
李八方