謝玲玲為林家誕下五名兒女孝賢、恬兒、顥伊、心兒和孝能，孝賢正修讀博士，恬兒是碩士生、顥伊是博士，心兒則正修讀碩士，五子女讀書都叻，這跟謝玲玲管教十分嚴格有關，30年前她已是一名「怪獸家長」。 她說：「一位補習老師，成個晏晝都喺屋企，一個補完又一個。」然後，一班仔女學芭蕾舞、學琴、學小提琴、學功夫……年終無休。謝玲玲表示會體罰，她說：「我都係俾爹哋媽咪喺屋企打，所以我教仔都要嚴。」
灌輸危機感
為子女更「貼地」，謝玲玲送大女恬兒去非洲做義工幫人起屋，孻仔孝能送去司機的公屋住幾晚，灌輸子女一種「危機感」，她說：「自細教佢哋，自己賺到嘅錢先係你，爹哋、媽咪、嫲嫲嘅唔一定要畀你。」五子女都是碩士、博士生，謝玲玲直認有一種虛榮心。她說：「其實仔女有冇成就，係媽咪虛榮感，呢方面我承認嘅，我一定要佢哋讀到碩士、博士，講出嚟就自己都好proud of，好開心。」
抱孫大不同
謝玲玲與林建岳離婚後，變了單親媽媽，她說：「如果兩夫妻，一個可以扮黑面，一個可以扮白面，嗰陣時乜都要做晒。有次帶埋細仔同朋友飲茶，佢扭計，當時七、八歲，旁邊啲人叫我唔好咁惡，我就話：『請你唔好出聲，我𠵱家教仔。』𠵱家諗番起都幾儍，以前太過着重『我係媽咪，要贏晒』，𠵱家我都改變咗，會商量吓。」
如今已經是婆婆的謝玲玲，有所領悟：「𠵱家我好錫孫，有少少補償我以前冇enjoy同仔女嘅感情，對住孫完全冇壓力同負擔，淨係錫佢同愛佢就得。」
採訪：梁錦雯
場地提供：Beefbar