特首林鄭月娥早前喺民主黨黨慶晚宴舉手捐3萬蚊畀李華明唱歌引起爭議，緊隨其後舉行黨慶嘅公民黨，唔知係咪怕咗娥特「太熱情」？決定唔請所有政府官員，黨魁AY楊岳橋話喎，想將晚宴集中喺公民社會同路人。
梁振英任特首年代，問責高官收晒柯打要杯葛民主派黨慶同籌款晚宴，到娥特上場雙方關係先有改善，林鄭日前唔只拉大隊出席民主黨籌款晚宴，仲罕有捐款支持兼IG hashtag大和解，點知惹嚟爭議，有人覺得民主黨唔應該收「政敵」捐款，民主黨中委會會就籌款進行檢討，唔知有乜經驗吸取到？
見到林鄭捐款引起風波，下月底舉行黨慶籌款晚宴嘅公民黨梗係醒水，決定唔請林鄭同一眾官員出席。AY解釋，想將晚宴集中喺公民社會同路人，所以一個官員都無請。至於到時有咩表演項目？聽聞上年跳探戈跳到胸骨都裂嘅陳淑莊，今年唔會表演，籌款會由黨內小鮮肉負責。