水豚生成一副天然呆樣，有種神奇魔力令人壓力拜拜，如果嚟緊復活節要飛日本探佢哋，荷包冇4位數都唔使諗，趣趣哋不如去海洋公園啦！
有得餵南美赤掌獠狨
公園聽日起到5月6號舉行「親親動物月」，齋聽個名都知有得同動物近距離接觸！今年公園揀咗勁治癒嘅水豚，以及同樣嚟自南美熱帶雨林嘅鄰居馬騮仔「赤掌獠狨」，同各位遊客約會。只要畀360蚊就可以參加每日一節、每節45分鐘嘅互動體驗，由護理員教大人細路關於兩種動物嘅習性同保育知識。參加者仲可以為佢哋準備小食同餵食㖭。
𠵱家海洋公園有3隻水豚，一男兩女分別叫Samba、Hatoru同May。而赤掌獠狨就一族9隻天性非常八卦，有嘢食時會伸手捉住個兜睇吓有咩食，所以大家餵食時，記住唔好手多多摸佢哋。
復活節適逢動物月，公園仲有大把環保活動帶畀小朋友，即日起至5月6日，港人到海洋公園正門票務部購買即日日間正價門票會享88折優惠，本周六門票收入會全數撥捐保育基金。去玩去癲，諗諗海洋公園啦。