堅唔堅？堅㗎，廉署堅係出咗Instagram兼邀請「Greedy堅」坐鎮，呢隻好食懶做、貪小便宜同hea爆嘅樹懶（圖），原來係廉署首位反派角色，有齊你同我等一般市民都可能有嘅小毛病：唔係大奸大惡、作奸犯科，卻會貪小便宜、得過且過，又喺一啲小事上講大話。
「Greedy堅」喺IG內活動多多，有個「講堅嗰句」嘅街頭訪問，主要訪問年輕人喺唔同處境下對「講真話」嘅取態，例如最討厭另一半講過乜嘢大話？又或者對父母講過嘅最大嘅大話係……希望用輕鬆惹笑手法，令大家了解誠實嘅重要性。據聞街訪環節稍後會殺入年輕人蒲點同校園，埋身同年輕人堅講真心話。
名為「greedy_kin」嘅廉署IG賬號早前以試驗性質推出，特別之處係廉署喺呢件事上堅放手，畀年輕同事自由創作，所以運作都一反傳統，唔以廉署做招徠，希望拉近同年輕人嘅距離。