立法會噚日朝早9點復會，只係用咗不足兩分鐘，就通過咗涉及1,131億嘅臨時撥款決議案。由於冇議員想再發言、同時冇人要求記名表決，本來前晚仲辯論得好熱烈嘅臨時撥款草案，就咁閃電過咗。唔知係咪因為會議太早，會內嘅議員得小貓三四隻，就咁放咗政府一馬，財經事務及庫務局局長劉怡翔喺通過後，即時輕鬆走人。
臨時撥款係等財政預算案未正式通過前，等政府有錢可用，金額約係整份預算案撥款總額嘅25%。劉怡翔嘅發言只有40秒，話政府會再喺立法會特別財委會回應議員提問，呼籲議員先支持臨時撥款，等政府可提供所需服務。由會議開始至通過，前後不足兩分鐘。
臨時撥款嘅決議周三晚開始討論，有7位民主派同1位建制派發言，大家都討論得面紅耳赤，民主派因為頂唔順民建聯周浩鼎嘅言論，紛紛發言，足足討論咗兩粒幾鐘，估唔到會議昨早續會，極速結束討論。