隨住世界盃就開鑼，各大體育用品製造商近期陸續發表各支球隊喺今屆世界盃新戰衣。今年似乎都流行簡約風，最近唔少球隊推出新款作客波衫都以白色作為主色。或者有人會覺得簡單，但簡約有簡約嘅不平凡，粉絲着住配條短褲出街都幾好睇㗎。
三大品牌搶市場
豹牌近日就公佈咗10款白色作客球衣，除咗烏拉圭、塞內加爾、塞爾維亞同瑞士等決賽周球隊，就連意大利、捷克同喀麥隆呢啲冇份入決賽周嘅球隊都有，照顧晒各支球隊嘅捧隊客。雖然今次豹牌嘅作客波衫清一色以白色為主，不過設計上都幾有心思，衫領嘅位置有球隊嘅主場顏色或國旗顏色配襯，冇咁單調。其中塞內加爾嘅作客波衫胸口位置仲有獅子嘅圖騰暗花，非常有型。一剔今屆贊助嘅決賽周球隊繼續有香港球迷都好關心嘅英格蘭，今次三獅軍團主場波衫嘅顏色配搭都好型，白色主色配襯「皇室藍」嘅隊徽同品牌標誌，再加上搶眼嘅紅色球員號碼同人名，極有英倫味道。
至於另一足球用品品牌三間喺今屆世界盃，一共有12支決賽周隊伍將會着住佢哋生產嘅波衫作賽。今年大玩復古，好似衞冕嘅德國咁，主場波衫就參照咗球隊1990年贏世界盃嘅經典戰衣，胸口位置印有幾何圖案嘅設計，不過顏色就由當年嘅黑、橙、金三色變成純黑線條，多咗一份型格感覺。
喺香港有唔少擁躉嘅日本隊，上年公佈嘅決賽周主場波衫就有唔少「負評」，俾球迷話似睡衣多過波衫，唔知今次嘅作客波衫又可唔可以搶番啲分呢？「藍武士」今次嘅作客波衫同樣有復古元素，左胸嘅三條灰色間就係參照1992年嘅日本隊球衣款式，當年日本奪得皇朝盃冠軍，係國家史上首個國際足球賽嘅錦標。而且今次嘅作客波衫係日本隊首次完全冇用藍色配色嘅波衫，完完全全變咗做「白武士」！
英軍三件頭西裝醒神
世界盃除咗係體育用品生產商嘅兵家必爭之地，亦都係高級服飾品牌嘅戰場，事關球員好多時會喺比賽以外嘅場合穿着由國家隊提供嘅西裝。就好似一向重視禮節嘅英格蘭咁，早前就為一班球員度身訂造一套三件頭西裝，每套衫仲會繡上球員嘅名㖭，係咪想即刻整番套先？