曼聯中場保羅普巴自從阿歷斯山齊士加盟後，有傳佢「扭計」要求加人工希望同山齊士睇齊，同領隊摩連奴好似多咗好多拗撬，踢波冇神冇氣。嚟到國際賽期，冇見普巴幾個月嘅法國教練迪甘斯都好震驚，仲話普巴喺紅魔好唔開心：「我唔知點解佢會遇上呢個狀況，當中涉及好多原因，但我相信佢唔會覺得開心。」
雖然普巴唔係幾開心，不過似乎冇影響佢對髮形嘅追求，呢位法國球星近日又染髮，搞到個頭又藍又黃，十足《龍珠超》入面孫悟空嘅「SSGSS」形態咁。咁搶眼，以後普巴就算坐冷板都唔會睇佢唔到啦！迪甘斯仲話普巴唔多高興，驚佢影響到代表法國喺世盃嘅演出，所以國家隊會派專家去同佢傾吓偈開導佢咁話。
梳爾無癮 楊格續約
有傳領隊摩連奴今季結束後想將佢放畀巴黎聖日耳門，用嚟交換意大利中場馬高華拉堤，而喺曼聯入面唔開心嘅唔止普巴，後衞勞基梳爾對自身處境都好沮喪，仲傳佢覺得自己俾摩連奴排斥，打算直接向球會嘅管理層投訴㖭。梳爾嚟到曼聯接近四年，發展一直都唔多順利，曾經因為重傷休養咗一段長時間、之後到上季摩連奴上任後又不受重用，仲畀摩佬多次公開評批，兩人關係已經麻麻，睇嚟呢位22歲小朋友下季出走嘅機會都唔細。
同樣都係左閘，曼聯32歲老將艾舒利楊格就受重用得多，曼聯禮拜一啟動續約條款，同呢位原本合約今季到期嘅英格蘭國腳再續約12個月。艾舒利楊格近年轉型擔任左閘表現越嚟越好，早兩個禮拜幫紅魔主場2:1贏利物浦嘅英超，仲成功凍結紅軍翼鋒穆罕默德沙拿，梗係有得留低啦！
傳新季變「粉紅魔」
另外，呢幾日接連流出兩件紅魔下季作客波衫嘅圖片，首先有一件好有突破性嘅粉紅色為主，搭配黑色褲嘅相流出，好唔好睇就因人而異喇，紅魔變「粉紅魔」，網上反應當然唔細啦；到周一再流出一件藍色為主加金色邊嘅波衫，真係唔知堅定流喇！