4位喺補選中當選嘅新議員，今日會喺立法會正式宣誓。重返議會嘅咖喱范，揀咗姚松炎用開嘅905室，位處民主黨鄺俊宇同街工梁耀忠中間。入伙前，咖喱范先要拎番張臨時議員證先入到大會，皆因之前佢交嘅證件相用咗白色做底色，唔啱立法會秘書處要求。
攞房後咖喱范就親自執拾佢嘅書、字同畫作及擺設，唔少字畫跟咗佢好多年，例如「民生無小事，民主要堅持」字畫同讀書時嘅作品等。除咗講政治同藝術，放喺議辦嘅書估唔到連漫畫都有，佢話有時做嘢做到攰睇一陣都唔錯。
咖喱范話議辦仲埋緊班，除咗立法會議辦仲有兩、三個空缺，佢亦要開番啲地區辦事處，都需要多幾位助理，佢想優先請番被DQ議員嘅助理。講到地辦就煩，事關唔少平租嘅房署好位，早就被其他議員揀咗，於是佢得番捱貴租或同新同盟區議員嘅地辦合併呢兩個選擇。