租屋租正鬼屋？信不信由你，但八方就唔多信！台灣有網民近日喺爆料公社fb發文，話以月租3.9萬元新台幣（約1萬港元）租咗台中市西區一棟透天厝（類似香港村屋），1樓當舖面，2樓以上當住宅，並喺樓梯裝閉路電視，點知影到椅上背囊突然好似被扯動，樓梯口燈泡都自動閃滅……
聽到毛管戙？片主引述風水師話掃到一隻「狗靈」，年初帶老婆同兩個月大BB到新居時，BB晚上望住天花板狂喊，老婆又話覺得有嘢；又引述廟宇女師傅話間屋原本係動物醫院，有個私設小型焚化爐燒咗好多小動物，有個身高1.8米男人喺2樓，只要添啲香油就搞掂。咁恐怖，點會唔搬走？片主卻繼續向彰化地藏王廟求助，稱只係報住址請神明查，就知3至5樓都係動物靈，2樓有個男人非自然死亡，靈魂太多，神明都搞唔掂，叫佢走為上策，至此佢先退租走人喎。
網民發揮偵探本色，發現條片經過剪接，好多破綻位，例如個紙箱根本擺位都唔同，就算唔懷疑造假，都覺得上載人疑心生暗鬼，例如燈光忽暗其實係部機啟動咗夜視功能。
識睇睇留言
Ken Lau：當天色轉黑，閉路電視就會開着紅外線，畫面就會有時出現彩色或黑白，生人唔生鬼，根本就冇事發生自己嚇自己。
Sam Luk：手提開震機都可以郁個袋啦！個袋咁輕。大驚小怪。
Ericjohn Lee：如果係堅料 佢應該攞nobel prize 佢影到物理學四種力以外的力 我唔明點解唔研究下 今時今日 乜人會驚鬼？
資料來源：《蘋果》網頁