阿根廷國家隊隊長美斯，日前喺一個當地電視節目透露，話如果今屆俄羅斯世界盃唔能夠幫阿根廷奪標嘅話，就會退出國家隊，睇嚟佢今次好認真：「我哋四年前喺巴西一樣渴望捧盃，但係我哋最後失敗咗，如果今次喺俄羅斯都衰埋嘅話，我唯一選擇就係退隊。」30歲嘅美斯亦有為自己一旦真係要掛靴而擔心，佢話：「好多球員都話，要決定掛靴係一件很困難嘅事，呢點我一啲都唔懷疑。𠵱家我每日都接受訓練同比賽，我不敢想像當我唔使再做呢件事之後，我仲能夠做乜嘢或者去邊到。」
美斯喺節目中又透露，退休後可能會留喺巴塞隆拿或者回到家鄉羅薩里奧生活。但佢對於阿根廷現時嘅治安問題就好關注同痛心：「我仲記得小時候能夠很安心地喺街上玩，但𠵱家阿根廷變得好危險。我期待呢個問題將來得以改善，等我地能夠寧靜同安全咁生活。」另外，美斯仲自爆呢兩季冇再喺球場上踢踢吓波嘔吐（左圖）嘅原因：「我好多年都鍾意食朱古力同飲汽水，呢啲嘢就係令我比賽時成日嘔吐嘅原因，我𠵱家已經戒咗呢類不良飲食習慣喇。」