民主黨噚晚喺九龍灣筵開60席舉行23周年黨慶晚宴，特首林鄭月娥一落機就去現場，坐足超過一小時認真畀面，仲捐出3萬元，贊助前立法會議員李華明唱一曲《笑看風雲》，配合其他贊助，一首歌仔為民主黨帶來32萬元捐款。林鄭嗰3萬，仲係民主黨首次獲特首捐款。
同陳太握手後少交流
三司長同部份局長都有現身酒會，但晚宴前就走人。民主黨安排林鄭、前政務司長陳方安生、民主黨前主席劉慧卿坐主家席，同枱有盛智文、李鵬飛、梁家傑、詹培忠。林鄭入座前，先後與陳太、劉慧卿、李永達握手，再俯身問候飛哥，之後才入座，坐喺主席胡志偉同盛智文中間，不過林鄭同陳太席間冇乜交談。
民主黨席前播出搞笑短片希望各界捐款，其中一幕講到打突先生黎日正Anson被調至日內瓦海外辦事處一事時，林鄭亦忍唔住笑出嚟。
前民主黨、喺新界東補選嘅范國威噚日都有現身，Gary話，自2010年退黨後再冇嚟過民主黨黨慶，覺得民主黨黨慶比起以前大型咗好多，多咗好多不同政治光譜嘅人士出席。晚宴上，除咗李華明唱歌，胡志偉都有唱，仲為黨籌得5萬元。民主黨整晚共籌得500萬元，少過去年嘅760萬。