根據葉一南統計，熬遊唐朝每日所需花費，折合二十一世紀港幣約為二萬元，嚇得我立即打消飛越時光探訪綺麗男的念頭。那豈不是比旅遊北歐更貴嗎？先幾年慕名到哥本哈根，物價之高令尋哥訪根的窮措大牙痛咁聲，熟悉行情的老馬（不是當時尚在營業中的Noma）還說，丹麥算得了什麼，挪威瑞典仲揦脷，但是即使如此，除非豪到堅持非五星酒店不住，都唔使大拿拿五位數字呀。這個價位，我寧願慳慳哋參觀保留了長安風貌的京都，食少兩餐懷石料理，幾乎可以買起成間SOU．SOU男裝部。萬一不小心搭上時空穿梭機，又咁啱落咗「貴都」個站，袋裏的錢連買個饅頭也不夠，睇怕只好把心一橫自薦任職青樓幫補盤川，儘管對講究實惠的基佬來說，賣笑不賣身比賣身不賣笑艱辛得多。
不過真正令我卻步唐朝的不是天價，而是衛生設備，「專用作清潔的『草紙』，在宋元之後才出現，唐代用的是樹葉、破布，或者是打磨光滑的木片竹片，叫『廁籌』」喎，問你驚唔驚？請注意，那些擦屁股恩物是循環再用的，晌屋企都話有私伙樹葉，於公共場所急起上嚟，就要像入賭場買籌碼一樣向守護公廁的阿叔阿嬸討幾片廁籌，就算霸氣要求「唔該畀啲新淨嘅吖」，終歸都係過盡千帆的二手貨，稍為有點潔癖的簡直不能想像。所謂一處鄉村一處例，入鄉之後漸漸隨俗，大概也會習以為常吧，譬如尊貴的日本肛門，由細到大天天被無微不至的沖洗器照顧，去到蠻荒的紐約倫敦香港，一時之間也很難適應，還不是悶聲不響處之泰然，回到原產地才大洗特洗？