入迪士尼做足準備，一張飛閒閒哋都$619，有啲人就揀入會做「奇妙處處通（MA）」會員，年中無限次入場兼享獨家體驗。迪士尼高級市務經理馬嘉倩Phyllis話，樂園𠵱家有逾20萬會員，九成係香港人，雖然最平嘅MA銀卡盛惠$1,178，但超過一半會員都係玩成2,000蚊張嘅金卡！你話香港人幾捨得使錢！
咁又難怪嘅，金卡MA全年340日一至日都入得場，Phyllis話吸引唔少家庭客，樂園嚟緊半年仲有MA獨享活動，包括參與Pixar好友夏日派對及Duffy做主角嘅舞台表演。唔係MA嘅你都有優惠嘅，探索家度假酒店套票賣$2,299（約47折）就可以住海景房、節日嘉年華入場票兩張同自助下午茶兩位，想帶小朋友去放電記得快啲報名。