曼聯𠵱家基本上得番英足盃冠軍可以爭，領隊摩連奴早幾日就發晒茅咁話曼聯嘅實力未足以喺歐聯有咩作為，英國《每日快報》就話，摩佬準備喺夏天嚟一場大清洗，預計賣走、約滿同會退休嘅球員加埋，會有10個球員離隊咁話！
來季會簽巴利、韋利安
據《每日快報》話，成日畀摩佬公開批評鬥心唔夠、操練態度差等嘅勞基梳爾，上禮拜六對白禮頓嘅英足盃仲半場被換走，兩人關係又去到新低點，佢就梗係第一個被賣啦，另外西班牙孖寶桑馬達、安達靴里拉、同埋四個後防基斯史摩寧、菲爾鍾斯、戴利白蘭特和達美安都會被踢走咁話，用嚟籌錢俾摩佬揮霍。另外，紅魔仲有30歲嘅費蘭尼今夏約滿，傳聞佢就會去加拉塔沙雷發展，而伊巴謙莫域亦都傳好大機會去美職掘埋最後一桶金，至於卡域克就一早公佈咗會掛靴。
有出就會有入，據報摩連奴希望買一堆球員，包括喺皇馬越來越唔受重用嘅加里夫巴利、熱刺後防雙星艾達韋列特同埋丹尼路斯，以及車仔舊部韋利安，同埋一路係曼城目標嘅薩克達中場費特山度士。