意大利經歷缺席世界盃嘅慘痛後，正式重新出發，暫代教練迪拜亞治奧喺上周六正式公佈今周友賽阿根廷同英格蘭嘅大軍名單，雖然仲有保方同基亞連尼等嘅老面孔，但亦有唔少後生仔撐場，包括費倫天拿翼鋒，名將基艾沙嘅仔仔費達歷高基艾沙，同埋今季喺AC米蘭大勇嘅前鋒柏德列古度尼，都係首次入選。
小基艾沙名將之後
曾經做過U21教練嘅迪拜亞治奧，今次選人都帶上咗五位上年有份出戰U21歐青賽嘅球員，其中包括20歲嘅費達歷高基艾沙。今季因為貝拿迪施治轉投祖雲達斯，令呢位小將喺費倫天拿嘅位置越見重要，今季上陣26場射入五球，表現不俗。另一位得到首頂喼帽嘅仲有效力AC嘅柏德列古度尼，這名小將今季各項賽事已經為AC射入14球，成為球隊首席射手。
除咗費達歷高基艾沙同柏德列古度尼兩位新生代之外，已經受多家大會注意嘅阿特蘭大中場白賴仁基斯坦迪、羅馬嘅羅倫素柏歷堅尼、博洛尼亞嘅施蒙尼華迪，仲有森多利亞嘅基安費拉利等新面孔悉數入選。然而，都有唔少選人備受非議，例如曼聯甚少出場機會嘅達美安，同埋喺祖記都係坐多過踢嘅魯加尼都有份入選，就令球迷非常不解。
保方繼續保住後方
舊人方面，迪拜亞治奧點兵前已表明會邀請保方出山助陣，果然大軍名單仍然有呢位年屆40歲嘅老將。今季喺拉素表現神勇，暫時排意甲射手榜第一嘅恩莫比尼擔綱領銜前線。不過，今季喺尼斯持續有出色表現嘅巴洛迪利，同埋華倫西亞射手施蒙尼沙薩，繼續受到冷待。意大利將會喺周五出戰阿根廷，下周二就會作客溫布萊鬥英格蘭。但上周六意甲面對面對史帕爾，已入選的基亞連尼勇戰受傷，未知到時能否出場下，意軍已經補選韋斯咸嘅奧邦拿。