練馬師葉楚航於上期（14日）谷戰勝出「神寳金剛」、「心慷慨」起孖兼捧盃，今季他在快活谷已取得12Win，搏殺算係得心應手。
嚟緊周三（21日）谷草夜賽，葉楚航雖然只得3駒報名列陣，但馬匹實力甚佳，絕對具食糊籌碼，其中一駒便吸引到雷神莫雷拉注目。
所指的是出爭四班1200米的「霸勝」，此匹4歲馬至今只跑過三仗，踏入今季有顯著進步，兩戰田草短途1000及1200米，分別喺梁家俊胯下取得一亞一第五成績，跑第二的一仗水準極高，該場季軍馬「金鼓齊鳴」最近已補中取勝升上三班。
「霸勝」今次雖初跑谷草，但牠曾於1月下旬試谷閘跑第二，只係輸俾谷草專家「放眼量」，早已試準場地性能。
「霸勝」晨課已由雷神過檔快跳，話咁易已從一直騎開的梁家俊手中，把帥印搶過來，看來這匹質新馬大有機會順利打開勝門。