曼聯日前喺歐聯16強次回合主場輸畀西維爾出局，領隊摩連奴受盡千夫所指，仲俾部份球迷柴台。佢喺上周五嘅賽前記者會承認責任，強調唔會逃避、哭泣，但又用咗12分鐘講歷史，證明自己「其實唔太差」。佢話紅魔自2011年嚟只曾殺入歐聯八強一次，為自己喺16強出局辯護：「對上一次曼聯奪歐聯冠軍要數到08年，11年入咗決賽但出局，2012年更喺分組賽出局。13年喺16強出局，14年八強出局，2015年冇躋身歐聯，2016年打歐霸亦喺16強出局。」
摩佬繼續話：「17年紅魔踢歐霸，最終贏冠軍重返歐聯。喺18年，曼聯喺18分滿分嘅小組賽攞到15分，最終喺16強主場出局，呢啲就係『足球遺產』。
摩佬仲話︰「當有一日我離開，下任領隊會發現，盧卡古、尼曼查馬迪、迪基亞，有唔同心態、唔同背景、唔同地位、唔同技能，呢啲就係『足球遺產』。」